Milyonçu Bəxtiyar Dali ilə bağlı qalmaqallı ittiham: Müğənniyə qarşı zorakılıq cəhdi iddia olunur
Novxanıdakı dəbdəbəli imarəti ilə tanınan Bəxtiyar Dali kimi tanınan Bəxtiyar Qaraşovun ittiham olunduğu cinayət işi ilə bağlı yeni təfərrüatlar məlum olub.
Veten.Az xəbər verir ki, Oxu.Az-ın əldə etdiyi məlumata görə, hadisə bu ilin iyul ayında Sumqayıt şəhərində yerləşən hotel-restoranlardan birində baş verib.
Məlumata əsasən, Bəxtiyar Qaraşov iki dostu ilə birlikdə istirahət etmək üçün həmin obyektə gəlib. Bir müddət yeyib-içdikdən sonra onlar kabinetə iki xanım müğənni dəvət ediblər.
İddialara görə, müğənnilərdən bir müddət mahnı oxumalarını istəyiblər. Daha sonra Bəxtiyar Dali xanımlardan birindən oriyental rəqs etməsini tələb edib. Gənc müğənni bu rəqsi bacarmadığını bildirsə də, onun rəqs etməyə məcbur edildiyi iddia olunur.
Məlumata görə, daha sonra xanıma pul qarşılığında cinsi əlaqə təklif edilib. Müğənni isə bu təklifdən imtina edib.
İttihama əsasən, bundan sonra Bəxtiyar Dali dostlarından birini xanımlardan biri ilə birlikdə kabinetdən göndərib. Daha sonra o, digər dostu ilə birlikdə kabinetdə qalan müğənniyə qarşı cinsi zorakılıq etməyə cəhd göstərib.
Qadının qışqırığını eşidən hotelin sahibi və əməkdaşları kabinetə gəliblər. Qapını sındıraraq içəri daxil olan şəxslər müğənnini xilas ediblər. Hadisə yerinə polis əməkdaşları çağırılıb.
Bildirilib ki, Bəxtiyar Dali hadisə yerində sərxoş vəziyyətdə saxlanılıb. Onun dostu isə əvvəlcə ərazidən qaçsa da, polis əməkdaşlarının keçirdikləri əməliyyat tədbirləri nəticəsində sonradan saxlanılaraq istintaqa təhvil verilib.
Faktla bağlı cinayət işi başlanılıb. Sumqayıt Şəhər Məhkəməsinin qərarı ilə hər iki şəxs barəsində dörd aylıq həbs qətimkan tədbiri seçilib.
Qeyd edək ki, hadisə ilə bağlı yayılan məlumatlar ittiham xarakterlidir. Təqsirləndirilən şəxslərin təqsiri qanuni qüvvəyə minmiş məhkəmə hökmü ilə sübuta yetirilməyib.
