Göyçayda geniş ərazini əhatə edən yanğın: Hektarlarla örüş və taxıl sahəsi alovlanıb
Göyçay rayonunda geniş ərazini əhatə edən yanğın baş verib.
Veten.Az xəbər verir ki, yanğın ilkin olaraq rayonun Qaraməryəm kəndi ərazisində başlayıb. Güclü küləyin təsiri nəticəsində alov qısa müddətdə yaxın kəndlər istiqamətində yayılaraq geniş sahəni əhatə edib.
Yanğın nəticəsində dağlıq və düzənlik ərazilərdə yerləşən hektarlarla örüş sahəsi, biçilmiş taxıl zəmiləri və kolluq ərazilər yanıb.
Alovun yaşayış məntəqələrinə keçməsinin qarşısını almaq məqsədilə hadisə yerinə Azərbaycan Respublikası Fövqəladə Hallar Nazirliyinin Dövlət Yanğından Mühafizə Xidmətinin Göyçay Rayon Yanğından Mühafizə Hissəsinin əməkdaşları və xüsusi texnikaları cəlb olunub.
Hazırda yanğının tam söndürülməsi, eləcə də alovun daha geniş ərazilərə yayılmasının qarşısının alınması istiqamətində zəruri tədbirlər davam etdirilir.
Yanğının başvermə səbəbi və dəymiş ziyanın həcmi ilə bağlı araşdırma aparılır.
:::writing
