Bu gün Bərdə səhiyyəsində gördüklərimizi danmaq olmaz – Vüsal Məmmədovun gördüyü işlər
Bərdə səhiyyəsində dəyişiklikləri görməməzliyə vurmaq nə dərəcədə doğrudur?
Veten.Az Milli Xəbər Portalı bildirir ki Bərdə səhiyyəsinin Vüsal Məmmədovdan əvvəlki vəziyyəti bu sahədə çalışan və illərdir xidmət alan insanların bir çoxuna məlumdur. Bu gün isə baş verən dəyişiklikləri də obyektiv şəkildə qiymətləndirmək lazımdır.
Vüsal Məmmədov bir Bərdəli olaraq Bərdə səhiyyəsinin inkişafı üçün bir sıra təşəbbüslər göstərdi.
Ən sadə, lakin həyati əhəmiyyətli məsələlərdən biri generator sisteminin olmaması idi. Elektrik enerjisi kəsildikdə səhiyyə müəssisələrinin fəaliyyəti ciddi şəkildə çətinləşirdi. Bu gün isə müasir generator sistemlərinin quraşdırılması ilə bu problemin həlli istiqamətində mühüm addım atılıb.
Əməliyyat otaqlarında işıqlandırma və tibbi avadanlıqlar baxımından da dəyişikliklər edilib.
Doğum evində də şərait yenilənib. Əvvəlki çarpayıların vəziyyətindən narazılıqlar olduğu halda, bu gün daha müasir çarpayılar mövcuddur. Yataq dəstlərinin mütəmadi dəyişdirilməsi, xəstələrin qidalanması və ümumi təminat məsələlərinə daha ciddi yanaşılması da diqqət çəkir.
Bundan əlavə, MRT, KT və digər müasir tibbi avadanlıqların Bərdə səhiyyəsinə gətirilməsi diaqnostika imkanlarının genişləndirilməsi baxımından mühüm addımdır.
Əlbəttə, bütün bunlar Vüsal Məmmədovdan əvvəl də edilə bilərdi. Amma əsas sual budur: niyə edilmədi?
Bu gün müxtəlif ittihamlar səsləndirilir. Lakin işin içərisini, sənədləri və bütün detalları bilmədən kimisə günahlandırmaq nə dərəcədə doğrudur?
Qaranlığa daş atmaq asandır, faktlarla danışmaq isə daha doğrudur.
Araşdırmanın nəticəsini və rəsmi faktları gözləmək, həm görülən işləri, həm də səsləndirilən ittihamları obyektiv qiymətləndirmək lazımdır.
Bir həqiqəti də unutmayaq:
Bərdə səhiyyəsinin inkişafı üçün görülən hər müsbət iş ilk növbədə Bərdə sakinlərinə xidmət edir.
Bizim istəyimiz sadədir: Bərdə səhiyyəsi inkişaf etsin, xəstələr daha yüksək səviyyədə xidmət alsın və görülən işlər obyektiv qiymətləndirilsin.
