Dövlət xidmətlərində qanun pozuntularına görə cərimələr artırılır – 5 min manatadək cəza nəzərdə tutulur

Dövlət xidmətlərinin göstərilməsi zamanı qanunvericiliyin tələblərini pozan vəzifəli şəxsləri 250 manatdan 1050 manatadək, korrupsiya faktı barədə məlumat verən şəxslərə qarşı qisas məqsədilə qanunsuz tədbirlər görənləri isə 3 min manatdan 5 min manatadək cərimə gözləyir.

Veten.Az xəbər verir ki, bununla bağlı Cinayət Məcəlləsinə və İnzibati Xətalar Məcəlləsinə dəyişikliklər edilməsi haqqında qanun layihəsi Milli Məclisin iclasında müzakirəyə çıxarılıb və birinci oxunuşda qəbul edilib.

Layihəyə əsasən, dövlət xidmətlərinin göstərilməsi zamanı qanunvericiliklə müəyyən edilmiş tələblərin pozulmasına görə vəzifəli şəxslər üçün yeni inzibati cərimələr müəyyənləşdirilir.

Belə ki, dövlət xidmətlərinin göstərildiyi informasiya sistemlərində aparılan təkmilləşdirmə işləri barədə istifadəçilərin elektron qaydada məlumatlandırılmamasına görə 250-350 manat, xidmətlərin göstərilməsi qaydaları haqqında məlumat verilməməsinə görə isə 350-450 manat cərimə tətbiq olunacaq.

Elektron xidmətlər üzrə dövlət rüsumlarının və xidmət haqlarının elektron formada ödənilməsi imkanının yaradılmaması 450-550 manat, qanunla müəyyən edilmiş sənədlərin və zəruri məlumatların istifadəçilərə təqdim edilməməsi isə 550-650 manat cərimə ilə nəticələnə bilər.

Bundan əlavə, dövlət xidmətindən imtinanın və ya onun dayandırılmasının hüquqi əsasları, eləcə də şikayət etmək hüququ barədə məlumat verilməməsinə görə 650-750 manat cərimə nəzərdə tutulur.

Əlilliyi olan şəxslərin dövlət xidmətlərindən istifadəsi üçün zəruri şərait yaradılmadıqda 750-850 manat, dövlət xidmətləri müvafiq elektron reyestrə daxil edilmədən göstərildikdə 850-950 manat cərimə tətbiq ediləcək.

Xidmətlərin qanunvericiliyin tələblərinə uyğun göstərilməməsinə və ya xidmətin nəticəsi barədə istifadəçilərin məlumatlandırılmamasına görə isə vəzifəli şəxslər 950-1050 manat məbləğində cərimələnə bilərlər.

Korrupsiya barədə məlumat verənləri təqib edənlərə ağır cəza

Dəyişikliklərin diqqətçəkən məqamlarından biri də korrupsiya faktları barədə məlumat verən şəxslərin müdafiəsinin gücləndirilməsidir.

Belə ki, korrupsiya barədə məlumat verdiyinə görə şəxsdən qisas almaq məqsədilə ona intizam tənbehi tətbiq edilməsi, əmək müqaviləsinə xitam verilməsi, vəzifədən azad olunması, başqa işə keçirilməsi, əməkhaqqından qanunsuz tutulmalar aparılması və ya vəzifədə irəli çəkilməsinə maneçilik törədilməsinə görə 3 min manatdan 5 min manatadək cərimə müəyyənləşdirilməsi təklif olunur.

Məhkəmə ekspertləri ilə bağlı da cərimələr müəyyənləşdirilir

Qanun layihəsində məhkəmə ekspertizası fəaliyyəti ilə bağlı yeni inzibati məsuliyyət tədbirləri də yer alıb.

Məhkəmə Ekspertlərinin Reyestrinə daxil edilməyən şəxsin ekspert fəaliyyəti ilə məşğul olmasına görə fiziki şəxslər 2 min manat, vəzifəli şəxslər isə 3 min manat cərimə ediləcəklər.

Məhkəmə ekspertinə qanunsuz təsir göstərilməsi və ya ekspertizanın aparılmasına mane olunmasına görə fiziki şəxslər 300 manat, vəzifəli şəxslər 600 manat, hüquqi şəxslər isə 900 manat məbləğində cərimələnəcəklər.

Bundan başqa, ekspertiza üçün zəruri etalon nümunələrinin və texniki məlumatların təqdim edilməməsinə görə də inzibati məsuliyyət nəzərdə tutulur.

Pulsuz hüquqi yardımdan imtinaya görə cərimə

Layihəyə əsasən, pulsuz hüquqi yardım göstərmək öhdəliyi olan şəxslərin əsassız şəkildə bu yardımdan imtina etməsinə görə də cərimələr tətbiq ediləcək.

Fiziki şəxslər 100-200 manat, vəzifəli şəxslər 200-300 manat, hüquqi şəxslər isə 300-400 manat məbləğində cərimə oluna bilərlər. “Pro bono” hüquq xidmətləri göstərən şəxslər bu məsuliyyətdən istisna edilir.

Ekologiya və telekommunikasiya sahəsində də yeni cərimələr

Qanun layihəsində ətraf mühitin mühafizəsi və telekommunikasiya xidmətləri ilə bağlı pozuntulara görə də maliyyə sanksiyaları müəyyənləşdirilir.

Ətraf mühitin istehsalat monitorinqinin nəticələri barədə illik hesabatın vaxtında təqdim edilməməsinə görə vəzifəli şəxslər 3 min manat, hüquqi şəxslər isə 8 min manat cərimə ediləcəklər.

Ətraf mühitə təsirin qiymətləndirilməsi sənədinin rəsmi internet resursunda yerləşdirilməsi üçün aidiyyəti quruma təqdim edilməməsinə görə vəzifəli şəxslər üçün 2 min manat, hüquqi şəxslər üçün isə 4 min manat cərimə nəzərdə tutulur.

Telekommunikasiya operatoru və ya provayderi tərəfindən xidmətlərin müəyyən edilmiş keyfiyyət göstəricilərinə uyğun göstərilməməsinə görə vəzifəli şəxslər 500 manat, hüquqi şəxslər 1000 manat cərimə ediləcəklər.

Eyni pozuntunun inzibati tənbeh qərarı qüvvəyə mindikdən sonra bir il ərzində təkrar törədilməsi halında cərimələr müvafiq olaraq 1000 və 2000 manat təşkil edəcək.

Cinayət Məcəlləsinə də dəyişiklik təklif olunur

Cinayət Məcəlləsinə təklif edilən dəyişikliklər enerji təchizatı sahəsində bəzi cinayət tərkiblərinin terminologiyasının dəqiqləşdirilməsini, eləcə də məhkəmə aktı ilə müəyyən edilmiş öhdəliklərin hüquqi şəxslər tərəfindən icra edilməməsinə görə cinayət-hüquqi tədbirlərin tətbiqi ilə bağlı müddəaları əhatə edir.

Qeyd edək ki, qanun layihəsi Milli Məclisdə səsverməyə çıxarılaraq birinci oxunuşda qəbul edilib.