Şirvan şəhərində Azərbaycan Respublikasının Prezidenti, Yeni Azərbaycan Partiyasının (YAP) sədri İlham Əliyevin partiyanın VIII Qurultayındakı nitqindən irəli gələn vəzifələrə həsr olunmuş müşavirə keçirilib.
Veten.Az xəbər verir ki, oktyabrın iyirmi üçündə Şirvan Şəhər İcra Hakimiyyətində keçirilən müşavirədə şəhər icra hakimiyyətinin başçısı İlqar Abbasov, YAP Şirvan şəhər təşkilatının sədri Zahir Qəhrəmanov, icra hakimiyyəti başçısının müavinləri və aparatın əməkdaşları, hüquq-mühafizə orqanlarının, regional təşkilatların, idarə və müəssisələrin rəhbərləri, şəhid ailələrinin üzvləri, müharibə iştirakçıları, şəhərin ağsaqqalları, ziyalılar, gənclər, ictimaiyyət və media nümayəndələri iştirak ediblər.
Tədbirdən əvvəl iştirakçılar Ümummilli Lider Heydər Əliyevin Şirvan şəhərinin mərkəzi meydanında ucaldılmış abidəsini ziyarət edərək önünə gül dəstələri düzüblər. Daha sonra müşavirə akt zalında davam edib. Əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad olunub.
Müşavirədə Şirvan Şəhər İcra Hakimiyyətinin başçısı İlqar Abbasov geniş məruzə ilə çıxış edərək Prezident İlham Əliyevin YAP-ın VIII Qurultayındakı nitqindən irəli gələn əsas vəzifələr, ölkənin sosial-iqtisadi inkişafı, Şirvan şəhərində həyata keçirilən layihələr və milli təhlükəsizlik məsələləri barədə danışıb.
İlqar Abbasov strateji hədəflərin uğurla reallaşdırılması üçün bütün sahələrdə məqsədyönlü fəaliyyətin gücləndirilməsinin vacibliyini vurğulayıb. O, Ümummilli Lider Heydər Əliyevin əsasını qoyduğu dövlətçilik ənənələrinin və milli-mənəvi dəyərlərin qorunmasının, dövlətçilik ideologiyasının təbliğinin, gənc nəslin vətənpərvərlik ruhunda tərbiyə olunmasının əhəmiyyətini diqqətə çatdırıb.
Məruzədə uşaqların və gənclərin zərərli ideoloji təsirlərdən qorunması məsələsinə də xüsusi diqqət yetirilib. Qeyd olunub ki, sosial şəbəkələr və digər rəqəmsal platformalar vasitəsilə yayılan zərərli təbliğatın, dini radikalizm və xurafatın qarşısının alınması üçün ailə və məktəb əməkdaşlığı gücləndirilməli, valideynlərin maarifləndirilməsi istiqamətində tədbirlər görülməlidir. Eyni zamanda, uşaqların hüquqlarının, dünyəvi təhsil imkanlarının və sərbəst düşüncə qabiliyyətinin qorunmasının vacibliyi vurğulanıb.
Çıxış zamanı Azərbaycanın ərazi bütövlüyünün və suverenliyinin bərpası ilə nəticələnən tarixi Zəfərin əhəmiyyəti, ordu quruculuğunun möhkəmləndirilməsi, işğaldan azad edilmiş ərazilərdə aparılan bərpa və quruculuq işləri, iqtisadiyyatın gücləndirilməsi, sahibkarlığın inkişafı və əhalinin rifahının yüksəldilməsi istiqamətində qarşıda duran vəzifələr də diqqətə çatdırılıb.
İlqar Abbasov şəhid ailələrinə və müharibə iştirakçılarına dövlət qayğısının davam etdirilməsinin, onların sosial müdafiəsinin gücləndirilməsinin, eləcə də idarəetmədə müasir yanaşmaların tətbiqinin əhəmiyyətini qeyd edib. Bildirilib ki, qarşıya qoyulan vəzifələrin məsuliyyətlə və vaxtında icrası ölkənin davamlı inkişafına mühüm töhfə verəcək.
Müşavirədə çıxış edən “Şirvan” qəzetinin baş redaktoru, Şirvan Şəhər Ağsaqqallar Şurasının sədri Fəxrəddin Rəhimov, Şirvan şəhər 21 nömrəli tam orta ümumtəhsil məktəbinin direktoru Səadət Quliyeva, Şirvan Şəhər Mərkəzi Xəstəxanası PHŞ-nin direktoru Canəli Nəbiyev, Şirvan Dövlət İqtisadiyyat və Humanitar Kollecinin tarix müəllimi, əməkdar müəllim Mehran Əhməd qızı, şəhid anası Sevinc Hümbətova və Vətən müharibəsi əlili Aslan Cəfərov müzakirə olunan məsələlərlə bağlı fikirlərini bölüşüblər.
Çıxışlarda dövlətçilik ənənələrinin qorunması, milli-mənəvi dəyərlərə bağlılığın artırılması, gənclərin vətənpərvərlik ruhunda tərbiyəsi, ailə və təhsil müəssisələri arasında əməkdaşlığın gücləndirilməsi, uşaqların zərərli ideoloji təsirlərdən müdafiəsi və şəhidlərin qəhrəmanlıq irsinin təbliği məsələləri ön plana çəkilib. Həmçinin milli həmrəyliyin möhkəmləndirilməsinin və dövlət maraqlarının müdafiəsinin hər bir vətəndaşın mühüm vəzifəsi olduğu bildirilib.
Müşavirənin sonunda Prezident İlham Əliyevin qurultaydakı nitqindən irəli gələn vəzifələrin vaxtında və keyfiyyətlə yerinə yetirilməsi məqsədilə aidiyyəti qurumlara müvafiq tapşırıq və tövsiyələr verilib.
Yekun nitqi ilə çıxış edən İlqar Abbasov müzakirə olunan məsələlərin əhəmiyyətini bir daha vurğulayaraq iştirakçıları yüksək məsuliyyət nümayiş etdirməyə, ölkənin inkişafı və xalqın rifahı naminə səylərini birləşdirməyə çağırıb. O, dövlət başçısının müəyyən etdiyi vəzifələrin uğurla həyata keçiriləcəyinə əminliyini ifadə edib.
