Toylara 100 nəfərlik limit qoyulsun? — Sosioloqdan gözlənilməz təkliflər
Toy xərclərinin ailə büdcəsinə yaratdığı yük son vaxtlar cəmiyyətdə müzakirə olunan məsələlərdən birinə çevrilib. Sosioloq Hüseyn İbrahimov toy mərasimlərinin həm maliyyə, həm də sosial baxımdan yaratdığı yükün azaldılması üçün bir sıra məhdudiyyətlərin tətbiqini təklif edib.
Veten.Az xəbər verir ki, sosioloq “Yeni Sabah”a açıqlamasında bildirib ki, toy xərcləri artıq yalnız məclis zamanı çəkilən ödənişlərlə məhdudlaşmır. Xüsusilə qadınların toy mərasiminə hazırlığı ailələr üçün əlavə maliyyə yükü yaradır.
H.İbrahimovun sözlərinə görə, toyda iştirak bəzi hallarda könüllü sosial münasibətdən daha çox, insanların bir-biri qarşısında hiss etdiyi öhdəliyə çevrilir.
“Çox zaman insanlar ürəkdən toya getməkdən mənəvi zövq almırlar. Toyda iştirak məsələsi müəyyən mənada insanları bir-birinə borclu vəziyyətə salır. İnsanlar toya getdikdə yazılan pulu sonradan qaytarmaq məcburiyyətində qalırlar”, – deyə sosioloq bildirib.
O qeyd edib ki, maddi imkanları məhdud olan insanlar bəzən gündəlik və hətta vacib işlərini təxirə salaraq toy mərasimlərində iştirak etməyə məcbur qalırlar.
Sosioloq toyların şəhərlərdə əlavə nəqliyyat sıxlığı yaratdığını və bunun insanların psixoloji gərginliyini də artırdığını vurğulayıb.
“Toy 2 saatdan çox çəkməməlidir”
Hüseyn İbrahimov toy mərasimlərinin yaratdığı maliyyə və sosial yükün azaldılması üçün konkret qaydaların müzakirə olunmasını təklif edib.
Onun təklifləri arasında:
- toyların 2 saatdan artıq davam etməməsi;
- musiqinin səsinin aşağı salınması;
- körpə uşaqların mərasimlərdə iştirakına məhdudiyyət qoyulması;
- toy iştirakçılarının sayının maksimum 100 nəfərlə məhdudlaşdırılması var.
Sosioloqun fikrincə, 100 nəfərlik limit ailə üzvləri – qadın və kişi birlikdə nəzərə alınmaqla ümumi iştirakçı sayına şamil edilməlidir.
O hesab edir ki, belə məhdudiyyətlər tətbiq olunarsa, insanların toylarda iştirak tezliyi və bu mərasimlərə sərf etdiyi xərclər də əhəmiyyətli dərəcədə azala bilər.
Sosioloq düşünür ki, nəticədə toyların sayından və miqyasından daha çox keyfiyyətinə diqqət yetirilər, mərasimlər isə insanlarda əlavə gərginlik yaratmaq əvəzinə daha xoş ab-hava formalaşdırar.
