Fatma Yıldırım Bərdə rayonunun Türkmən kəndində sakinlərlə görüşüb – Yol layihəsi ilə bağlı açıqlama
Veten.Az xəbər verir ki Milli Məclisin deputatı Fatma Yıldırım Bərdə rayonunun Türkmən kəndində sakinlərlə növbəti vətəndaş qəbulunu keçirib.
Görüş zamanı kənd sakinlərini narahat edən məsələlər, onların fikir və təklifləri dinlənilib. Qəbulda əsas müraciətlərdən biri kənd yollarının vəziyyəti ilə bağlı olub.
Sakinlərin yol probleminin həlli ilə bağlı müraciətinə cavab olaraq deputat Fatma Yıldırım yolun yaxın günlərdə çəkiləcəyini bildirib. O, görüş iştirakçılarına yol layihəsi barədə məlumat verərək görüləcək işlərlə bağlı sakinləri məlumatlandırıb.
Vətəndaş qəbulunda suvarma ilə bağlı problemlər də diqqət mərkəzində olub. Səsləndirilən müraciətlər aidiyyəti qurumlara çatdırılıb və suvarma ilə bağlı bir sıra məsələlərin yerində həlli təmin edilib.
Deputat bildirib ki, vətəndaşların problemlərinin birbaşa dinlənilməsi və onların həlli istiqamətində ardıcıl tədbirlərin görülməsi əsas fəaliyyət istiqamətlərindən biridir.
Fatma Yıldırım sakinlərin fikir və təkliflərinin onun üçün xüsusi əhəmiyyət daşıdığını qeyd edib, görüşdə iştirak edən vətəndaşlara səmimi münasibətlərinə görə təşəkkür edib.
Görüş zamanı səsləndirilən digər müraciətlərin də həlli istiqamətində aidiyyəti dövlət qurumları qarşısında məsələlərin qaldırıldığı bildirilib.
