Kontakt Home-nun problemli kreditlər şöbəsi vətəndaşı təhqir edib — ŞİKAYƏT
Bərdə rayon sakini Kontakt Home mağazalar şəbəkəsinin problemli kreditlər şöbəsindən edilən zənglə bağlı Veten.Az saytının redaksiyasına müraciət edib.
Vətəndaşın redaksiyaya təqdim etdiyi məlumata görə, ona Kontakt Home-nun problemli kreditlər şöbəsindən zəng gəlib. Zəng edən şəxs onun dostunun mağazalar şəbəkəsinə olan kredit öhdəliyini yerinə yetirmədiyini və bununla bağlı məhkəməyə müraciət ediləcəyini bildirib.
Müraciət müəllifi isə həmin şəxsin dostu olduğunu və hazırda işdə olduğunu bildirərək, əgər məsələ hüquqi müstəvidə həll olunmalıdırsa, məhkəməyə müraciət edə biləcəklərini deyib.
İddialara görə, bundan sonra telefon danışığı zamanı problemli kreditlər şöbəsinin əməkdaşı vətəndaşa qarşı ağır söyüş və təhqiramiz ifadələr işlədib.
Bərdə sakini baş verən hadisədən narazılığını bildirərək, kredit öhdəliyi ona məxsus olmadığı halda, bu şəkildə təhqir olunmasının yolverilməz olduğunu qeyd edib.
Veten.Az olaraq məsələ ilə bağlı Kontakt Home şirkətinin də mövqeyini öyrənməyə çalışacağıq. Qarşı tərəfin açıqlaması daxil olduğu təqdirdə, xəbərə əlavə ediləcək.
