Azərbaycanda gənclər siyasəti uzun illərdir dövlət siyasətinin mühüm istiqamətlərindən biri kimi həyata keçirilir.
Bunu Veten.Az-a açıqlamasında Milli Məclisin deputatı Fatma Yıldırım deyib.
Onun sözlərinə görə, Gənclərin təhsil alması, inkişaf etməsi, ictimai həyatda fəal iştirakı, öz potensialını reallaşdırması üçün geniş imkanlar yaradılıb: “Gənclər Fondunun layihələri, könüllülük proqramları, regionlarda həyata keçirilən təşəbbüslər, intellektual və sosial layihələr bu siyasətin mühüm tərkib hissəsidir. Vətənpərvərlik isə yalnız Vətən haqqında danışmaqla formalaşmır. Vətənpərvərlik Vətəni tanımaqdan, onun tarixini, mədəniyyətini və milli dəyərlərini bilməkdən, dövlətçiliyinə sahib çıxmaqdan başlayır. 44 günlük Vətən müharibəsində və sonrakı mərhələdə Azərbaycan gənclərinin nümayiş etdirdiyi birlik, cəsarət və fədakarlıq bunun ən parlaq nümunəsidir”.
F. Yıldırım vurğulayıb ki, bu gün bizim əsas vəzifələrimizdən biri həmin ruhu gələcək nəsillərə düzgün şəkildə çatdırmaqdır: “Milli mənlik şüurunun inkişafı üçün gənclərimizə tariximizi yalnız dərsliklərdən öyrətməklə kifayətlənməməliyik. Onları Azərbaycanın müxtəlif bölgələrinə, tarixi-mədəni abidələrimizə, Qarabağ və Şərqi Zəngəzurda aparılan quruculuq işlərinə cəlb etmək, şəhid ailələri və qazilərimizlə görüşlərini təşkil etmək, milli-mənəvi dəyərlərimizi müasir təqdimatlarla gənclərə çatdırmaq çox vacibdir. Eyni zamanda müasir gəncliyin dünyası dəyişib”.
Deputat qeyd edib ki, “Bu gün sosial media, rəqəmsal platformalar və informasiya məkanı gənclərin dünyagörüşünə böyük təsir göstərir: “Ona görə də milli dəyərlərimizi gənclərə müasir, yaradıcı və onların dilində çatdırmalıyıq. Azərbaycan tarixini, ədəbiyyatını, mədəniyyətini və dövlətçilik ənənələrini müasir filmlər, sənədli layihələr, rəqəmsal kontent və sosial platformalar vasitəsilə daha geniş auditoriyaya təqdim etmək lazımdır. Prezident İlham Əliyevin də vurğuladığı kimi, təhsil, sosial-iqtisadi inkişaf və milli mənlik şüurunun gücləndirilməsi gənclərin sağlam dünyagörüşünün formalaşmasında mühüm rol oynayır. Mən hesab edirəm ki, bu gün qarşımızda duran əsas məqsəd yalnız vətənpərvər gənc yetişdirmək yox, eyni zamanda savadlı, düşünən, müasir dünyanı anlayan, milli kimliyini qoruyan və dövlətinə töhfə verməyə hazır olan gənc nəsil formalaşdırmaqdır. Azərbaycan gəncliyi həm öz milli köklərinə bağlı, həm də dünyanın çağırışlarına cavab verə biləcək səviyyədə olmalıdır. Çünki güclü dövlətin gələcəyi güclü, savadlı, vətənpərvər və məsuliyyətli gənclərin əlindədir. Bu gün bütün Azərbaycan gənclərini Beynəlxalq Gənclər Günü münasibətilə təbrik edir, hər birinə təhsilində, fəaliyyətində və həyat yolunda uğurlar arzulayıram. İnanıram ki, gənclərimiz Azərbaycanın gələcək uğurlarının ən fəal müəllifləri olacaqlar”.
