Milli Məclisin deputatı Fatma Yıldırım Veten.Az-a açıqlamasında 17 Oktyabr – Füzuli şəhəri günü münasibətilə fikirlərini bölüşüb.
Deputat bildirib ki, Füzuli şəhəri günü xalqımızın tarixi yaddaşında xüsusi yeri olan, qəhrəmanlıq salnaməmizin parlaq səhifələrindən birini təşkil edən əlamətdar gündür. Bu gün Azərbaycan xalqının Vətən sevgisinin, sarsılmaz iradəsinin, Müzəffər Ordumuzun gücünün və dövlətimizin qətiyyətli siyasətinin təntənəsidir.
Fatma Yıldırım qeyd edib ki, 1993-cü ildə Füzuli şəhərinin və rayonun böyük hissəsinin Ermənistanın silahlı qüvvələri tərəfindən işğal edilməsi minlərlə soydaşımızın doğma yurdlarından didərgin düşməsinə, tarixi və mədəni irsimizin dağıdılmasına səbəb olub. İşğal illərində Füzulinin yaşayış məntəqələri, tarixi abidələri və infrastrukturu ciddi dağıntılara məruz qalıb.
Deputat vurğulayıb ki, bütün bunlara baxmayaraq, xalqımız doğma torpaqlarına qayıdacağına olan inamını heç vaxt itirməyib. Azərbaycan dövləti ərazi bütövlüyümüzün və suverenliyimizin bərpasını əsas məqsəd kimi müəyyənləşdirib. Müzəffər Ali Baş Komandan, Prezident İlham Əliyevin rəhbərliyi ilə həyata keçirilən məqsədyönlü siyasət, güclü iqtisadiyyatın və müasir ordunun formalaşdırılması tarixi Zəfərin əsasını qoyub.
Fatma Yıldırım bildirib ki, 2020-ci il sentyabrın 27-də başlayan Vətən müharibəsi Azərbaycan xalqının milli birliyini, ordumuzun yüksək döyüş qabiliyyətini və əsgər-zabitlərimizin misilsiz qəhrəmanlığını bütün dünyaya nümayiş etdirib. Füzuli uğrunda gedən döyüşlər müharibənin ən ağır və strateji baxımdan mühüm mərhələlərindən biri olub. Düşmənin illərlə qurduğu istehkamların yarılması, mürəkkəb müdafiə xətlərinin aşılması Azərbaycan Ordusunun gücünü və peşəkarlığını bir daha təsdiqləyib.
Deputat diqqətə çatdırıb ki, bu gün Füzuli şəhəri işğaldan azad edilmiş ərazilərimizin bərpası və yenidən qurulması istiqamətində həyata keçirilən genişmiqyaslı işlərin mühüm mərkəzlərindən biridir. Prezident İlham Əliyevin rəhbərliyi ilə şəhərin müasir şəhərsalma prinsipləri əsasında yenidən qurulması, yol-nəqliyyat, enerji və digər infrastruktur layihələrinin həyata keçirilməsi Füzulinin gələcək inkişafı üçün möhkəm zəmin yaradır.
Fatma Yıldırımın sözlərinə görə, Füzulidə aparılan quruculuq işlərinin ən mühüm məqsədi doğma yurdlarından didərgin düşmüş soydaşlarımızın təhlükəsiz və layiqli yaşayış şəraitində öz evlərinə qayıtmasını təmin etməkdir. 2023-cü ilin avqustundan etibarən şəhərə keçmiş məcburi köçkünlərin qayıdışına başlanılması Böyük Qayıdış Proqramının mühüm mərhələlərindən biridir. Hər bir ailənin doğma torpağına qayıtması, hər bir evdə yenidən həyatın canlanması dövlətimizin həyata keçirdiyi siyasətin humanist mahiyyətini nümayiş etdirir.
Deputat qeyd edib ki, Füzulinin dirçəlişi, eyni zamanda, Azərbaycanın beynəlxalq əməkdaşlıq əlaqələrinin və dostluq münasibətlərinin təzahürüdür. Qardaş Özbəkistanın təşəbbüsü ilə şəhərdə Mirzə Uluqbəy adına orta məktəbin, Qazaxıstanın dəstəyi ilə Kurmanqazı adına Uşaq Yaradıcılıq Mərkəzinin inşa edilməsi türk dünyasının həmrəyliyinin, ortaq tarixi köklərimizin və sarsılmaz qardaşlığımızın parlaq nümunəsidir. Bu layihələr azad edilmiş torpaqlarımızın gələcəyinə, təhsilə, mədəniyyətə və gənc nəslin inkişafına verilən töhfələrdir.
Fatma Yıldırım işğaldan azad edilmiş ərazilərdə mina təhlükəsinin insanların təhlükəsizliyinə və bərpa prosesinə ciddi maneə olaraq qaldığını da vurğulayıb. O bildirib ki, Füzulinin minalardan təmizlənməsi, infrastrukturun tam bərpası və keçmiş məcburi köçkünlərin təhlükəsiz yaşayışının təmin olunması dövlətimizin qarşısında duran prioritet vəzifələrdəndir. Ermənistanın işğal dövründə törətdiyi dağıntıların və vurduğu ziyanın beynəlxalq hüquq çərçivəsində qiymətləndirilməsi, məsuliyyət məsələsinin diqqətdə saxlanılması da mühüm əhəmiyyət daşıyır.
Deputat qeyd edib ki, Füzuli bu gün dirçəlişin, doğma yurda qayıdışın və azadlığın rəmzidir. Prezident İlham Əliyevin rəhbərliyi ilə həyata keçirilən Böyük Qayıdış Proqramı nəticəsində şəhər yenidən canlanır, müasir infrastruktur qurulur, insanların öz doğma torpaqlarında təhlükəsiz və firavan yaşaması üçün şərait yaradılır.
Fatma Yıldırım 17 Oktyabr – Füzuli şəhəri günü münasibətilə bütün füzulililəri və bu əlamətdar günü qürurla qeyd edən həmvətənlərimizi təbrik edib. O, Füzulinin azadlığı uğrunda canından keçən şəhidlərimizin əziz xatirəsini ehtiramla yad edib, qazilərimizə möhkəm cansağlığı arzulayıb.
