Vətən.az xəbər verir ki, Milli Məclisin deputatı Fatma Yıldırım Azərbaycan Prezidenti İlham Əliyevin Özbəkistana dövlət səfəri çərçivəsində mətbuata verdiyi bəyanatı və Azərbaycan-Özbəkistan münasibətlərinin inkişaf perspektivlərini dəyərləndirib.
Deputat qeyd edib ki, Prezident İlham Əliyevin avqustun 23-də Özbəkistana dövlət səfəri çərçivəsində verdiyi bəyanat iki ölkə arasında münasibətlərin yüksək səviyyəsini, əldə olunan mühüm nəticələri və qarşıdakı dövr üçün müəyyənləşdirilən hədəfləri bir daha ortaya qoyub.
Fatma Yıldırımın sözlərinə görə, Özbəkistanın sürətli inkişaf və böyük dəyişikliklər mərhələsindən keçməsi, Daşkəndin müasir və dinamik şəhərə çevrilməsi Prezident Şavkat Mirziyoyevin həyata keçirdiyi islahatların və uzaqgörən siyasətin nəticəsidir.
Deputat vurğulayıb ki, Azərbaycan və Özbəkistan arasında münasibətlər artıq yalnız dostluq və tarixi qardaşlıq çərçivəsində deyil, konkret layihələr və qarşılıqlı faydalı əməkdaşlıq əsasında inkişaf edir.
“Ticarət dövriyyəsinin bir milyard dollara çatdırılması ilə bağlı qarşıya qoyulan hədəf, enerji, nəqliyyat, investisiya, sənaye, kənd təsərrüfatı, turizm və digər sahələrdə həyata keçirilən layihələr əməkdaşlığımızın böyük potensiala malik olduğunu göstərir”, – deyə Fatma Yıldırım bildirib.
Deputat hesab edir ki, Azərbaycan-Özbəkistan münasibətlərinin gücü yalnız iqtisadi göstəricilərlə ölçülə bilməz. Onun sözlərinə görə, bu əlaqələrin təməlində ortaq tarix, mədəniyyət, milli-mənəvi dəyərlər və xalqlar arasında əsrlər boyu formalaşmış qardaşlıq dayanır.
Fatma Yıldırım həmçinin Özbəkistanın Azərbaycanın Qarabağda həyata keçirdiyi quruculuq prosesində iştirakını iki ölkə arasındakı qardaşlığın mühüm nümunələrindən biri kimi qiymətləndirib.
Deputat qeyd edib ki, Füzulidə Mirzə Uluqbəy adına məktəbin inşası, Xankəndidə tikiş fabrikinin yaradılmasına investisiya qoyulması və digər layihələr Özbəkistanın Azərbaycanın quruculuq prosesinə verdiyi dəstəyin göstəricisidir.
Onun sözlərinə görə, Daşkənddə Azərbaycan və Özbəkistan Ali Dövlətlərarası Şurasının üçüncü iclasının keçirilməsi də münasibətlərin xüsusi xarakterini təsdiqləyir.
Fatma Yıldırım bildirib ki, iki dövlət başçısının ali dövlət təltiflərinə layiq görülməsi də Prezident İlham Əliyev və Prezident Şavkat Mirziyoyev arasında yüksək qarşılıqlı ehtiramın, eyni zamanda Azərbaycan və Özbəkistan xalqları arasındakı sarsılmaz dostluğun rəmzidir.
Deputat vurğulayıb ki, səfər çərçivəsində imzalanan sənədlər və əldə olunan razılaşmalar qarşıdakı illərdə əməkdaşlığın daha da genişlənməsi üçün mühüm hüquqi və praktiki baza yaradır.
“Bu gün Azərbaycan və Özbəkistan təkcə iki qardaş dövlət kimi deyil, regionun inkişafına və Türk dünyasının güclənməsinə mühüm töhfə verən strateji tərəfdaşlar kimi çıxış edirlər”, – deyə deputat qeyd edib.
Fatma Yıldırımın fikrincə, nəqliyyat dəhlizlərinin inkişafı, iqtisadi əlaqələrin genişlənməsi, enerji və investisiya layihələri iki ölkənin qarşılıqlı imkanlarını daha da artıracaq.
Deputat əlavə edib ki, Prezident İlham Əliyevin Özbəkistana dövlət səfəri Azərbaycan-Özbəkistan qardaşlığının yeni inkişaf mərhələsinin mühüm göstəricisi kimi tarixə düşəcək.
“Əminəm ki, qarşıdakı illərdə bu qardaşlıq daha böyük layihələr, daha geniş əməkdaşlıq və daha möhtəşəm nəticələrlə özünü göstərəcək”, – Fatma Yıldırım bildirib.
