Daxili İşlər Nazirliyinin Kibercinayətkarlıqla Mübarizə Baş İdarəsinin (KMBİ) əməkdaşları tərəfindən keçirilən növbəti əməliyyat-texniki tədbirlər nəticəsində müxtəlif xarici ölkələrin informasiya sistemlərinə kiberhücumlar təşkil etməkdə şübhəli bilinən iki nəfər saxlanılıb.
Veten.az xəbər verir ki, saxlanılanlar 23 yaşlı Ramil Feyziyev və 22 yaşlı Elçin Abdullazadədir.
Araşdırmalar zamanı müəyyən olunub ki, onlar müxtəlif xarici dövlətlərə məxsus çoxsaylı veb-saytların serverlərinə qanunsuz müdaxilə edərək həmin resursların idarəetmə panellərinə icazəsiz giriş əldə ediblər.
İstintaqla müəyyən edilib ki, şübhəlilər məxfi məlumatları ələ keçirdikdən sonra internet resurslarının əsas səhifələrində dəyişikliklər edib, özlərinə məxsus proqram təminatı yerləşdirərək saytları nəzarətə götürüblər. Daha sonra isə ələ keçirdikləri internet resurslarının idarəetmə panellərinin satışını təşkil ediblər.
Araşdırma zamanı məlum olub ki, Ramil Feyziyev ümumilikdə 2300, Elçin Abdullazadə isə 179 xarici veb-sayta qanunsuz müdaxilə edərək həmin internet resurslarını ələ keçirib.
Faktla bağlı Baş İdarədə Cinayət Məcəlləsinin müvafiq maddəsi ilə cinayət işi başlanılıb. Hazırda kiberpolis tərəfindən müxtəlif ölkələrin hüquq-mühafizə orqanları ilə qarşılıqlı əməkdaşlıq çərçivəsində əməliyyat-istintaq tədbirləri davam etdirilir.
Daxili İşlər Nazirliyi bir daha vətəndaşların diqqətinə çatdırıb ki, informasiya sistemlərinə qanunsuz müdaxilə etmək, onları ələ keçirmək və ya satışını həyata keçirmək cinayət əməlidir. Bu kimi qanunsuz hərəkətlərə yol verən şəxslər həm Azərbaycan, həm də beynəlxalq qanunvericiliyin tələblərinə uyğun olaraq hüquqi məsuliyyət daşıyırlar.
Qeyd olunub ki, rəqəmsal mühitdə anonim qalacağını düşünən şəxslər müasir istintaq və kiberkriminalistika imkanları sayəsində müəyyən edilərək qanun qarşısında cavab verməyə məcbur olurlar. Yüksək texniki bilik və bacarıqların yalnız qanuni məqsədlərə, cəmiyyətin, dövlətin və informasiya təhlükəsizliyinin qorunmasına xidmət etməsi vacibdir.
