Milli Məclisin deputatı Fatma Yıldırım 25 Oktyabr – Qubadlı şəhəri günü ilə bağlı sosial şəbəkə hesabında paylaşım edib.
Veten.Az xəbər verir ki, deputat paylaşımında Qubadlı şəhərinin işğaldan azad olunmasının Azərbaycanın ərazi bütövlüyünün bərpası və milli iradəsinin təntənəsi baxımından mühüm tarixi hadisə olduğunu vurğulayıb.
Fatma Yıldırım qeyd edib ki, 2020-ci il oktyabrın 25-də Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun həyata keçirdiyi uğurlu hərbi əməliyyatlar nəticəsində Qubadlı şəhəri işğaldan azad edilib. O, bu hadisənin 44 günlük Vətən müharibəsinin gedişində mühüm əhəmiyyət daşıdığını və Azərbaycanın tarixi Zəfərinə gedən yolu daha da möhkəmləndirdiyini bildirib.
Deputat paylaşımında Qubadlının işğal dövründə böyük dağıntılara məruz qaldığını, yaşayış məntəqələrinin, evlərin, sosial və mədəni obyektlərin dağıdıldığını, minlərlə soydaşımızın doğma yurdlarından didərgin düşdüyünü xatırladıb. Bununla belə, xalqımızın doğma torpaqlara qayıdış inamının heç vaxt sarsılmadığını diqqətə çatdırıb.
Fatma Yıldırım hazırda Qubadlıda genişmiqyaslı bərpa və quruculuq işlərinin aparıldığını qeyd edib. Şəhərin Baş planının təsdiqlənməsi, yeni yaşayış məhəllələrinin salınması, Mahruzlu və Zilanlı kəndlərinin yenidən qurulması, yol və enerji infrastrukturunun inkişaf etdirilməsi rayonun gələcəyinə hesablanmış mühüm addımlar kimi qiymətləndirilib.
Deputat vurğulayıb ki, Prezident İlham Əliyevin rəhbərliyi ilə işğaldan azad edilmiş ərazilərdə həyata keçirilən quruculuq layihələri Azərbaycanın gücünü, dövlətin öz vətəndaşlarına diqqətini və tarixi torpaqların dirçəldilməsi istiqamətində nümayiş etdirilən qətiyyəti əks etdirir.
Paylaşımının sonunda Fatma Yıldırım Qubadlı şəhərinin azadlığı uğrunda canından keçən şəhidlərin xatirəsini dərin ehtiramla yad edib, qazilərə cansağlığı arzulayıb. O, 25 Oktyabr – Qubadlı şəhəri gününün xalqımızın birliyini, Vətən sevgisini və qəhrəmanlığını bir daha nümayiş etdirən əlamətdar tarix olduğunu vurğulayıb.
